期望

期望係一樣擾人既東西、煩惱既根源。

小朋友既時候，細佬仔對呢個世界認識唔深，好多野都未聽過、未見過，未體驗過。咁所有野對細佬仔黎講都係新事物，0係對所有事物都冇期望底下，小朋友都會好容易開心、滿足。

而人大左係越來越難感到快樂，或當快樂時個滿足感相對係少左，我諗其中一個原因係大人對事物有期望。例如當一個去過日本迪士尼而覺得好好玩既時候，佢知道香港都會有個迪士尼樂園應該會好開心，好熱切期待香港迪士尼樂園既開幕，諗住一開第一個星期就去玩。當期望咁大時，失望既機會都好大啦，至少好難會有喜出望外既感覺，因為一開始個"望"都咁大喇，重要"望外"tim，真係好難。

萬事都唔好抱咁大期望，可能會比人話消極。其實咁做只係積極地令自己更快樂。凡事皆以平常心面對唔代表消極，同negative thinking都扯唔上關係。

我係一個非常之有期望既人，對身邊人既期望重厲害。所以，對住佢地有時會失望，會想辦法"邊察"佢地做得更好，我可能會閙、發脾氣、黑面、或拍枱閙人仆街等等，其實對佢地都係唔公平既。各位受過我氣既朋友......sorry呀!!!

最近，跟一位球技不俗既朋友打波。由於對佢既期望都頗大，當發覺佢果日發揮未如理想時，我竟然有少少失望。又係一個對佢唔公平既judgment。其實當日佢已經打得好過好多人，只係我自己要求高。當一個人迷失左自己時，佢發現身邊既人一次又一次令佢失望，佢可能會開始產生怨恨，令原本開心既都變唔開心。

又再講下好友AL。佢想搵個男朋友係高大靚仔、有錢有車有樓、唔可以靠屋企，重有係年輕(30歲樓下)。佢失望既機會又係好大，重話係教數學，一計就知個probability好細啦，重要向呢個理想出發。希望佢快d清醒啦。