十年人事

每日打blog實在係有難度。見到人每日都打，重要打咁長，真係佩服。

********************************************************

呢排報紙猛寫十年回顧，咁我又回顧下啦......

1997年，我十六歲，讀緊中四，重係一條傻仔咁，朋友唔多個，又冇乜嗜好，睇下電視又一日。不過，我記得果年係好有心機讀書，成績係好好。

十年光景，建立左我一頁resume。

- 考左會考、高考。雖然唔係考得好好，不過都收貨啦，至少讀到大學。

- 0係港大攞左個電子工程既學位。成績麻麻，要三年半先畢業。果時好驚畢唔到業，但原來都有2nd lower，好開心架喇。

- 學識左泰文同普通話。呢兩樣野都有用，一樣係去玩時用，一樣係番工日日用。雖然冇花時間0係英文度，不過我心知係進步左，academic既野差左，實用既野叻左。

- 做過六間公司，超過半年既有兩間。如有意外都係做營業員，叫做搵到條路。事業黎講，我由初生之犢到而家有幾年工作經驗，心態的確改變了很多。每一間公司都有唔好既地方，天下咁多公司，點搵一間完美既出黎，把注意力放在現有工作，享受呢份工重實際。縱使外面有比而家呢份更好既工，但我短期內唔會轉。

- 發現自己係冇目標，又冇事業心既人。成日提住要做生意，其實搵咁多錢都唔知做乜，我又唔係要買樓結婚。到我搵到個目標先再發奮啦，而家hea住先。

- 去過歐洲、加拿大同埋東南亞數個國家旅行。諗唔到乜野地方真係好想去，其實同邊個去緊要過去邊度。不過，好既旅行partner難求，又未必夾到時間，退而求其次傾到計既都殺啦。有另一半就更perfect，但我其樣不揚，呢個option都唔抱太大期望。

- 好朋友可遇不可求。呢個班底同十年前差唔多。

- 有戀愛經驗。這是過去十年最重要既經歷。有呢十年經歷，希望未來十年可以過得更精彩。

- 健康，一樣係唔太好。而家決心要多做運動，希望十年後我可以話自己健康左好多啦。

- 屋企人，都係咁。係自己大個左，發少左阿媽脾氣，不過間唔中都會失控。白龍王都叫我控制下自己情緒，慢慢黎啦。

細個時恨做大人，不知不覺原來做左大人，都係做小朋友開心d